北京奧運開幕典禮：超正！

我好少會對奧運開幕典禮有興趣，但係身為中國人，北京奧運喎，點都要俾面睇睇。點知俾佢嚇親，我睇睇吓發現自己個口擘大咗，就知有幾掂！張藝謀有計！

初初諗住，唉，大陸搞呢類表演通常都係得個粗嘈字又老老土土咁，唔係有啲紙扎公仔化裝+誇張定格笑容嘅恐怖小朋友大叫「歡迎歡迎」，就係有啲好似機械人嘅軍人操兵 . . . . . . 雖然我都無估錯，但係只係佔好少部份，其他環節實在太精彩！！我睇BBC所以唔知啲環節嘅名，但就特別鐘意講印冊術同打鼓倒數嘅環節。非常有藝術感，又好hi-tech，見到啲人嘅超級賣力嘅演出，令我都幾感動，覺得中國幾千年嘅文化好勁，但係又慨歎啲勁嘢全部都比較「遠古」，近代啲嘅成就好似淨係得送人上太空，怪就怪上一世紀嘅中國曆史比較坎坷。

郎朗個髮型真係不敢恭唯，佢需要換個型象顧問，Sarah Brightman 好在唔係出好耐，同佢一齊唱歌嗰位好似賣豬肉嘅內地男歌手點解喺呢啲盛事度要著黑色 T 恤？仲有，今朝睇報紙先知最後揸住聖火飛嚟飛去嗰個肥叔叔 — 原來係大名鼎鼎嘅體操王子李寧! 鼎！真係好耐冇見！